Nā te Minita Tuarua o Ngā Take Māori a Nanaia Mahuta i whakapuaki kua tohua ko Kaiwhakawā Matua Fox hei Heamana o Te Rōpū Whakamana i Te Tiriti o Waitangi.
Kei aku iti, kei aku rahi, kei ngā mātā waka o te motu, tēnā koutou
I te Paraire, te 1 o Hepetema 2023, i whakapuakina e Hōnore Nanaia Mahuta, te Minita Tuarua o Ngā Take Māori, ko Kaiwhakawā Matua Caren Leslie Fox te Heamana o Te Rōpū Whakamana i Te Tiriti o Waitangi.
He uri a Kaiwhakawā Matua Fox nō Ngāti Porou me Rongowhakaata, ā, he hono hoki ōna ki Te Whānau a Apanui. Ko ia te kaiwhakawā tuarima kua tohua hei Heamana o Te Rōpū Whakamana i Te Tiriti o Waitangi, whai muri i a Kaiwhakawā Matua Kenneth Gillanders Scott, Tā Kaiwhakawā Taihakurei Durie, Tā Kaiwhakawā Joe Williams me Kaiwhakawā Matua Wilson Isaac.
I tohua a Kaiwhakawā Matua Fox hei kaiwhakawā mō Te Kooti Whenua Māori i te 1 o Oketopa 2000, ā, i muri paku mai i tohua ko ia te Āpiha Whakahaere o te uiui o takiwā o Te Puku o Te Ika a Te Rōpū Whakamana i Te Tiriti o Waitangi i te tau 2001. He maha ngā uiui a te Rōpū Whakamana nāna i ārahi, tae atu ki ngā uiui ā-rohe o Porirua ki Manawatū me Te Rohe Pōtae, a Tomokia ngā tatau o Matangireia, me ngā uiui whāwhai mō ngā kerēme e pā ana ki te ahumoana, ngā hātepe mō te whakataunga me te mana kōkiri i te take Tiriti a Te Arawa, te kaupapahere a te Karauna mō Te Kōhanga Reo, me te arotake a te Karauna i te Ture Whanaketanga Hapori Māori me Ngā Wātene Māori. I tohua anō ia hei Kaiwhakawā Taiao Whakakapi i te tau 2009.
I tohua a Kaiwhakawā Matua Fox hei Kaiwhakawā Matua Tuarua o Te Kooti Whenua Māori i te tau 2010, ā, hei Kaiwhakawā Matua o te Kooti i te tau 2023. I te 24 o Ākuhata 2023, i whakahaerehia tana whakawahitanga i Te Pā, Te Whare Wānanga o Waikato.
I mua i tōna tohutanga ki te pae whakawā, he Pūkenga Ture a Kaiwhakawā Matua Whakakapi Fox i Te Herenga Waka, ā, he Pūkenga Ture Matua me te Tumuaki Tohu Paerua i Te Whare Wānanga o Waikato. Ko ia hoki te rōia mō ngā kaikerēme Tiriti me ngā kiritaki whenua Māori. He tohu LLM tōna mai i Te Herenga Waka, ā, i te tau 2023 i whiwhi ia i tōna tohu Kairangi i Te Whare Wānanga o Awanuiārangi mō tana tuhingaroa "Ko te mana te utu: Narratives of sovereignty, law, and tribal citizenship in the Pōtikirua ki te Toka-a-Taiau District".
Ka noho tonu a Kaiwhakawā Sarah Reeves hei Heamana Tuarua o Te Rōpū Whakamana i Te Tiriti o Waitangi.
Tirohia te tuhipānui a Hōnore Nanaia Mahuta kei te paetukutuku a Te Whare Miēre i konei.